仲達 - 雄龍優點多籮籮|頭號目標

第三場四班一二○○米。對有刨馬嘅讀者來講,「雄龍」嘅優點應毋須多費唇舌,不外乎都係上季尾賽事水準好、最後一仗輸受困好唔抵、季初縮程有利、A欄上半場有機會偏差利追,同埋暑期小休復課快,似係季初盡早用等等。不過真係有刨馬的話,同樣會被一樣嘢嚇怕,就係上周沙田草閘要騎而反應唔多好。所以是否信任佢作重心,很大程度視乎你怎樣看待那課閘。

試閘雖然唔係真跑,但當然都有參考價值,不過都要視乎馬房作風,譬如告東尼嘅馬便周時都要力騎,但絕對唔代表差。亦有啲馬房嘅試閘,其實唔好太重視。記得六年前,偉廄有一匹「夢幻仙子」初出,因為賽前試閘表現差,臨場是逾二十倍的冷門,結果一出即勝,返到凱旋門時,鞍上人柏寶很無奈地攤開雙手,潛台詞應該係:「我都唔知㗎,隻馬試閘係無喎!」自此之後,我就時時提醒自己,如果鍾意一啲馬房嘅馬,唔好單單因為試閘表現而放棄,而且隨時仲好分咗。
仲達

hd