【古天后日誌】美債息回落 短線高增長股表現較佳

更新時間:09:40 2021-06-21
發佈時間:09:00 2021-06-21
6月21日,多雲,有幾陣驟雨,局部地區有雷暴,日間時間酷熱。聯儲局由鴿轉鷹,引發市場上周表現波動,投資者憂慮加息速度或較預期早及快,拖累上周五美股表現。美股三大指數上周五報跌,道指跌533點;標指跌55點,跟道指齊齊跌逾1%;納指則跌130點,跌幅接近1%。美國10年長債戡孳息率低見1.43厘,反映資金流入債市避險。
有分析指出,長息下跌反映市場對長期經濟增長樂觀情緒減弱;而短期債息上揚,則反映對聯儲局加息預期。高盛認為,聯儲局早前「放鷹」,遭投資者解讀為美國經濟擴張喺疫情後可能受壓。而一向立場偏鴿嘅路易斯聯邦儲備銀行行長忽然轉鷹,預計聯儲局可能喺2022年底首次加息。不過唔少聯儲局鴿派官員喺上周五開腔,表示為促使勞動力市場回復到疫前水平,2023年底前應維持貼近零息。鴿派官員強調只要通脹預期保持穩定,當局應保持耐心,真正實現就業最大化。喺聯儲局鷹鴿兩派交纏下,主席鮑爺喺美國周二到美國眾議院新冠病毒小組委員會作證,市場將關注其有關論述聯儲局對策及經濟。
唔少專家認為,股市喺6月餘下時間何去何從,取決於鮑爺本周喺聽證會講話,而鷹派官員會否收回有關明年底加息嘅睇法,若然鷹派繼續放風提早加息,美股可能繼續受壓。不過若然如此,美股又未至於全軍覆沒,因為資金有機會喺經濟復甦放慢之際,從傳統周期股如建築、航空、工業和石油相關等股份,並重新流入高增長股。
當然喺美股高處不勝寒之際,唔少淡友又高聲疾呼泡沫即將爆破,美股最慘烈嘅崩盤隨時殺到。不過市場仍有好友指,當聯儲局結束每年1.4萬億美元量寬(QE)措施,將對美股帶嚟幅度低於5%嘅打擊,而美企盈利雙位數增長可抵銷相關影響。好友QMA投資策略總監基翁指出,今年企業盈利料勁增40%,加上利率仍相當低,環境利好股票,已增加持倉,並密切關注10年期美債孳息走勢,若升至2厘,勢有利價值股;若維持現時約1.5厘左右,則科技股會繼續做好。即係債息高低美股都有得玩,只係資金將偏好唔同板塊而已。
聯儲局忽然鴿轉鷹,明顯係唔想通脹失控,只要通脹上升只係短暫,股市仍然係最吸引嘅投資工具之一。至於港股呢邊,喺過去半年未有跟隨美股上闖高峰破頂,表現長期落後。經過五窮未太窮嘅5月後,暫時6月表現又唔太絕,仍然喺區間上落,炒股唔炒市格局持續,資金輪流炒作落後板塊。眼見美債息回落,高增長股已較年初高位回落唔少,已見資金從新吸納,加上6月半年結效應,6月餘下時間,高增長股可以睇高一線。
古天后
(徐狄怡,證監會持牌人)