古天后日誌｜中概股未必全面退市切勿過度恐慌嚇自己

更新時間：09:57 2021-12-06
發佈時間：09:00 2021-12-06

12月6日，天晴乾燥，早晚清涼，日夜溫差較大。美股上周五走軟，納指跌295點，跌幅近2%，道指跟標指分別跌59點及38點。市場對變種病毒對經濟影響有分歧，而喺全球疫情反覆之際，通脹卻持續升溫，令國際貨幣基金組織(IMF)敦促美國聯儲局加快縮減買債行動。不過上周五美股表現至差嘅，仍然係中概股，滴滴出行正式啟動於美股退市計劃，令一眾中概股跌到一仆一碌，喺美國上市嘅阿里巴巴(09988)，當晚ADR更急跌逾8%，低見109.12元。其他中概股京東(09618)及網易(09999)等，亦難逃一跌。

對於美國有意全面封殺中概股，古天后又唔係睇得太悲觀，雖然中概股喺美國除牌，無法享有較高估值，但若然退市美國，要接觸國際投資者及方便集資，回流港股上市當然係出路，而國際投資者要買入相關股份，相關股份於美股除牌後，自然要返嚟港股呢邊入貨，畢竟對國際投資者嚟講，內地企業仍有一定吸引力。

與此同時，中國證監會周日(5日)表示，正與美國監管機構溝通並取得積極進展，並指有關中方推動喺美中企退市嘅報導「完全是誤讀」。中證監首先澄清，近期有媒體報道中國監管部門將禁止協議控制(VIE，或稱可變利益實體)架構企業赴境外上市，推動喺美上市嘅中國企業退市，「這完全是誤解誤讀」。據悉，部份境內企業正積極與境內外監管機構溝通，推進赴美上市事宜。

喺中美審計監管合作方面，中證監近期與美國證券管理委員會(SEC)、美國上市公司會計監督管理委員會(PCAOB)等監管機構，就解決合作中存在嘅問題進行了坦誠、有建設性溝通，對個別重點事項推進合作方面取得了積極進展。

既然阿爺開到口派定心丸，姑且對中概股退市唔好太過恐慌，只要相關股份能符合美國審計要求，唔見得真係會引發中概股全面退市危機。大家心知肚明，喺美國上市嘅中概股，對於華爾街嚟講係一嚿肥豬肉，即使中美雙方繼續明爭暗鬥，亦無理由要打爛中美兩地投行嘅飯碗，況且所有中概股真係退市嘅話，反而港股呢邊可以受惠，港交所(00388)呢兩日逆市走強，正好證實在呢一點。

古天后

(徐狄怡，證監會持牌人)