古天后日誌|港股中期走勢取決24000能否企穩

1月12日,大致多雲,早晚清涼,日間短暫時間有陽光。美國聯儲局鷹派場有所軟化,指聯儲局嘅貨幣政策「正常化的道路漫長」,美股扭轉幾日跌勢,隔晚先跌後回升。三大指數向上,道指升185點;標指升42點;納指升210點。市場已對今年加息有晒心理備,細摩行政總裁戴蒙預期,通脹很可能比想像中嚴重,聯儲局今年將至少加息4次,期間會為市場帶嚟波動,企業會重新「計數」,惟總括而言,美國經濟能輕易承受加息一厘。

港股呢邊亦逐步向好,恒指突破10日線( 23312)及20日線( 23268)後,今日順勢挑戰50日線( 24060),而50日線一向係大市中期走勢嘅方向指標,只要大市能收復50日線並企穩,即係24000關企穩,下一步當然係向住100日線( 24663)進發。

而港股呢一輪由上月低位反彈,主要由傳統股,尤其金融股所帶動,喺息口趨升下,大部份銀行股做好,但重上50日線開始,應該要輪到重磅科技股發力,ATMXJ之中,暫時以京東(09618)表現稍勝。雖然騰訊(00700)較早前以派送形式,變相減持京東股份,正因為騰訊減持,京東可避過被監管機構指控涉任何壟斷行為,而其業務發展並未有因為騰訊減持而有任何重大改變,京東反而較其他騰訊仍持較重股權嘅科企如美團(03690)更為安全,預期呢一期可跑贏其他科網股。

雖然,早前有傳今年地方政府不設「能耗雙控」目標,以及印尼對煤炭一度實施出口禁令,拖累新能源及傳統火電業務兼備嘅電力股。然而,相信內地不再一刀切減碳,避免再發生去年地方政府追趕進度拉閘限電亂局。同時,不設年度目標並不代表放棄2030年碳達峰方向,市場對此似乎過於敏感。暫時只係市場資金流向較集中傳統股,及重磅科技股配置,令電力股呢個板塊表現較為落後,但中線而言,電力股喺受惠國策下,今年表現應該唔會太差,短期疲弱嘅走勢,反而係收集嘅好機會。

古天后

(徐狄怡,證監會持牌人)