古天后日誌｜港股劏完肥牛欠成交仍難急彈
發佈時間：09:00 2022-05-10
5月10日，多雲，有幾陣驟雨，雨勢稍後變為頻密及有幾陣雷暴。雖然鮑爺已派定心丸，指未來排除加息0.75厘，只係喺油價高企下，通脹難以對付，聯儲局不得不繼續加息以壓抑通脹，高估值嘅科技股繼續受壓，加上周末期指虛擬貨幣急挫，市場信心疲弱，美股三大指數周一跌勢持續，道指跌653點；標指跌132點；納指跌幅更超過4%；三大指數都跌至今年低位。
強如科技強頭一樣要插水，重磅科技股跌逾3%比比皆是，科技股沽壓重重，當然係跟息口趨升有關，尤其當美國嘅經濟數據，反映經濟增長不如預期，甚至有陷入衰退嘅危機，高估值嘅股份就更難企得住腳。嚟緊美國將會公布4月份CPI，由於上月油價高企，估計呢一轉個CPI都未能見頂回落，小心數據公布後再對美股帶嚟衝擊。美國上季GDP已出現1.4%倒退，如果第二季衰退持續，咁美國經濟出現衰退機會大增，屆時聯儲局就進退兩難，經濟放緩之際，物價高企，形成滯脹，不得不小心提防。
美元加息 人幣續弱
至於人民幣呢兩日繼續疲弱，歸根究底當然係資金因應美元加息而流走，加上封城令經濟雪上加霜，加大資金流走壓力。而經濟不景氣，資金撤離A股速度更快，加上樓市亦不景氣，財富效應係令資金加速逃離股市套現，對A股構成壓力。而近日A股成交低迷，正好說明內地缺水情況嚴重。不過阿爺致力穩經濟，當A股跌到咁上下，阿爺總會出招救市，只係每次救市力度已一蟹不如一蟹，暫對後市難有太大憧憬。
港股喺全球股市不景氣下，當然難獨善其身，隔晚美股急挫，今日港股難免低開，不過牛證重貨區喺19200至19600點，殺完呢一批重牛，港股或者有喘息機會，但要出現3月中嘅大幅反彈，似乎欠缺條件，今日低開後，跌幅即使收窄，但低位徘徊，短期除非有重大利好消息刺激，否則港股可能要一段時間喺低位游走，短期仍然喺20000點之下整固。
古天后
(徐狄怡，證監會持牌人)
