古天后日誌｜市場憧憬減關稅 港股料重上二萬二
發佈時間：09:00 2022-07-05
7月5日，大致多雲，有幾陣驟雨，局部地區有雷暴。隔晚美股假期，歐洲股市向好，道指期貨做好，港股期貨喺新加坡亦做好，預計今日港股應可以重返22000水平。通脹繼續影響住全世界嘅企業，即係加息係各地央行無可奈何要繼續執行嘅一個貨幣政策。不過近日歐美股市反彈，好明顯係市場眼見喺通脹威脅之下，企業生意難捱，經濟有陷入衰退嘅危機，如此一來，本來收緊嘅貨幣政策，或需要作出調整，由收緊再次轉向放鬆。
至於事實是否如此，古天后則有所懷疑，因為高通脹對經濟嘅威脅未解除下，央行一旦放水，令通脹進一步失控，企業經營只有難有加難。不過美國方面，除咗以加息去控制通脹之外，另一個可行方法，就係削減關稅，以抑壓從外部輸入嘅通脹壓力。有消息指美國方面最快會喺今個星期內宣布取消對部分中國消費品加徵嘅關稅，此外仲可能啟動一項針對行業補貼新調查，但留意科技等戰略領域關稅或被提高。正因為呢個消息，中美股市炒上。
至於中港股市呢邊，同樣面對通脹問題，但由於內地實行計劃經濟，當民生用品價格持續上升，阿爺會以行政手段控制，最新鮮熱辣嘅就係管到去豬肉價格，試圖以行政手段控制豬肉價格升幅。睇返A股喺7月首個交易日做好，暫時保持強勢，主要靠外資積極入市，噚日外資就買入咗超過70億元A股，呢個係近日A股上升嘅主要動力。
恒指22500阻力仍大
恒指方面，噚日早段一度回落至21500水平之下即迅速反彈，最終恒指噚日報收21830點，成交1314億元唔算多，暫時恒指仍然喺區間內移動，22400至22500嘅阻力仍大，不過每次回調底部卻呈一浪高於一浪嘅狀態，要做淡基本唔容易，但喺浪頂再做好，值博率卻相當有限。
最大問題係指數權重嘅騰訊(00700)，主要股東已表明減持，雖然未有明確指示要沽幾多貨，但至少咁大批貨要待價而沽，騰訊自然都唔升得去邊，就算市況向好，都只係跌唔落。至於另一重磅股阿里(09988)，喺CCASS見到高盛接咗大批貨，係咪主要股東搬定貨過嚟香港呢邊，隨時喺市場沽貨，抑或部署批股減持，暫時不得而知，但咁大嚿貨擺得喺CCASS，又點會無行動。而美團(03690)就未見CCASS有太大變動，但美團近日已成為大戶舞高弄低數嘅工具，大市日升日跌，美團亦如此。
古天后
(徐狄怡，證監會持牌人)
