古天后日誌｜軟銀以阿里遠期合約套現 變相令阿里保持區間上落
發佈時間：09:00 2022-08-04
8月4日，多雲，有狂風驟雨，雨勢有時頗大。美股隔晚繼續做好，雖然聯儲局鷹派代表指要提前加息，希望年底息口可以加至3.75%，不過美股被樂觀情緒所籠罩，三大指數繼續向上。道指升416點，標指升63點，納指更升逾2%，勁升319點。
雖然已公布業績嘅美企，大多表現未如理想，調低下季甚至全年預測，不過市場反而認為經濟可能衰退嘅情況下，聯儲局或放慢加息步伐，甚至明年要開始掉頭減息，只不過喺目前高通脹環境下，聯儲局基本上無乜可能放水，明年減息只係市場一廂情願嘅想法。
至於歐洲方面問題更大，俄烏戰爭持續下，能源成本狂升已令唔少歐洲企業吃不消，通脹高企令經營本大增，加上過去兩年疫情持續，令唔少企業債台高築，唔少企業選擇破產而非重組，可見歐洲唔少企業已抱放棄心態，對前景睇法悲觀。咁嘅情況下歐洲都無法放水，只能無奈地收緊貨幣供應，試問美國情況未有比歐洲更差，基本上無任何條件放水。
阿里短期沽壓解除
至於港股呢邊，未有擺脫上落格局，台海局勢緊張，早兩日中港兩地股市喺回調下，成交反而增加，反映跌市下沽壓又增強。不過隔晚阿里(09988)上升，並帶動其他中概股做好，主要係有報導指軟銀將透過預付遠期合約（prepaid forward contracts）出售所持三分之一阿里股份，融資220億美元。軟銀呢個舉動，無疑係令市場鬆咗一口氣，皆因軟銀咁大手貨，暫時搵到融資出路，唔需要喺市場直接沽貨，短期沽壓解除，對阿里股價係正面嘅。
不過軟銀呢一個動作，等同將呢批貨按咗畀銀行，雖然名義上軟銀仍然持有呢批貨，但實際上喺合約期內，銀行一方係有權動用呢批貨，喺市場操作。即係銀行見阿里股價高出合約嘅接貨價，銀行就有機會喺市場沽出，並以較低價格買返，即係可以高沽低揸，變相就會令阿里股價保持咗喺一個區間之內。即係喺一段時間之內，阿里都會喺區間內上落，不妨參考返近日阿里嘅股價高低位，底部係接近86至90元，而頂部係105至110元，可以喺呢個範圍之內炒上落。
古天后
(徐狄怡，證監會持牌人)
