古天后日誌｜港股成交日復日縮水 最怕演變為陰乾市況
發佈時間：09:00 2022-08-09
8月9日，多雲，有狂風驟雨及雷暴，有時風勢及雨勢頗大。美股隔晚個別發展，道指升29點；標指跟納指則分別跌5點及13點，雖見回吐，但沽壓唔算嚴重。專注圖像處理器(GPU)業務嘅無廠半導體公司英偉達(Nvidia)罕有地提前披露季度收入數據。於截至7月底止一季，公司收入為67億美元，按年升幅只得3%，遠差過業績指引81億美元，公司稱主要由於遊戲業務疲弱所致。公司股價全日跌6.3%
Nvida嘅盈利預告，反映喺美國經濟放緩下，企業盈利已見倒退，並預期第3季會進一步惡化，但市場氣氛卻相當樂觀，對壞消息反應全無，過去兩週美股易升難跌。正如台積電業績中指出，多間企業有意降低下半年晶片代工訂單數量15%，反映需求疲弱，其中包括AAPL及NVDA，台積電管理層指2023年將會是晶片行業困難嘅一年。但晶片股卻反而炒上，AMD同樣喺業績欠佳情況下，股價一樣炒高。
資金開始轉炒股仔
不過三大主要指數已逼近阻力位，重磅股上升動力大減，資金開始轉炒股仔，上周新股上市嘅HKD跟MEGL爆炒暴升，而呢兩日又嚟到散戶至愛嘅AMC同GME，短短一個星期勁升五成，妖股抬頭，雞犬皆升，都係時候提高警戒。
自2008年美國金融海嘯之後，長期QE令市場熱錢充斥，過度量寛下，扭曲投資者固有投資策略，由追求盈利穩建嘅公司，大膽轉去投資一啲非但未有盈利，反而年年燒錢嘅公司，目的係期望呢啲公司喺業務成長下擴張，從而來嚟高增長。唔少基金不斷追逐呢類股份，令到超高估值股份湧現。但貨幣寬鬆年代結束，再無便宜資金畀呢類公司任性燒錢，市場亦漸漸回歸理性，呢啲公司估值亦急跌，唔少基金因此損手，軟銀正正係呢種投資模式下，瘋狂損手嘅表表姐。軟銀過去一個季度錄得破紀綠的3.16萬億日圓淨虧損，折合1838億港元，輸得幾甘大家有目共睹，就連有盈利嘅阿里(09988)亦逼於無奈賤賣，可見息口上升下，過去嘅燒銀紙遊戲已無法再玩落去。
至於港股喺20000點附近窄幅上落磨爛席，成交額噚日縮水到只有749億元，買賣兩閒，最怕係成交一直縮水，慢慢步入陰乾局面，呢個亦係無資金入場嘅原因，難怪缸邊友都捨港股而去。
古天后
(徐狄怡，證監會持牌人)
