古天后日誌|恒指上升軌穩守可挑戰百日線

更新時間:10:27 2022-11-29
發佈時間:10:27 2022-11-29

英國新首相辛偉誠發表上任後首次外交政策演講,指中英關係的黃金時代已經結束,中國對英國利益和價值的系統性挑戰,正變得越來越激烈。並表示,英國對中國的態度需要改變,中國有意識地利用國家力量的所有手段,來爭奪全球影響力。

辛偉誠強調,在擔任英國首相期間不會選擇維持現狀,也不會用宏大的言辭,而是會採取堅定的實用主義(robust pragmatism)來對抗國際競爭者。但他也稱,無法輕易忽略中國的國際地位,包括全球經濟穩定及氣候變遷等多項議題。

英鎊兌在岸人民幣現報8.636,升0.24%;兌離岸人民幣現報8.6466,跌0.16%;兌港元現報9.3703,升0.32%。

11月29日,大致天晴,天氣炎熱,晚間有薄霧。隔晚美股受聯儲局有委員放鷹影響,三大指數向下,齊齊跌逾1%。標指喺4100點前阻力唔細,暫時能守住3900短線支持,仍有條件挑戰阻力,睇嚟要喺3900-4100之間整固一下,目前資金入場變得審慎,畢竟由10月低位反彈咗咁多,加上接近年紀,資金買貨唔會再咁積極。

油價跟大宗商品價格回落,市場預期未來通脹放緩增速,10年期債息回落至3.62%,預示明年初息口於5%左右見頂。美聯儲局雖然遲咗起步加息,但經過幾次密密加息後,通脹總算壓得住,睇怕就算通脹見頂都唔會咁快減息,同埋聯儲局官員會不斷出口術放鷹,以防市場過熱,要有心理準備,每次有官員出嚟放鷹,美股都會有啲震盪。不過把口放鷹,同實際議息又兩回事,只要通脹能成功控制,聯儲局當然無必要夾硬加息令經濟硬著陸。

睇返有關感恩節嘅銷售數據,從Black Friday線上銷售仍能再升2.3%創出新高,連帶週一嘅Cyber Monday也有8.5%的高單位增長,美國經濟仍然強勁。週三及週五會公佈小非農及非農數字,過往若新增職位大幅增加,聯儲局會擔心經濟過熱扯高經濟,令美聯儲有更大空間去加息。目前形勢有變,就業數據好可能變成好事,反映美國經濟更大機會軟著陸,相信都係美聯儲局所樂見。

至於港股,似乎都跟住古天后嘅劇本走,噚日大市因為內地疫情擴散,兼多地爆發反抗疫示威,恒指低開一度失守17000,但最終收復20及50日線,並企穩17000水平,港股成功喺回調後再次回升,之前預期結算轉倉完成後,大市有條件繼續向上挑戰18500-19000水平。而噚日大市回落至17000水平之下,買盤再現,成交亦回升至1000億元之上,12月大市乘住年結之勢,重上萬八無難事,跟住就係18500-19000,呢個係年結目標,噚日低位撈咗嘅指數重磅股,暫時可以坐定定等食糊。