古天后日誌|港股本周有望回補9月中下跌裂口


12月5日,早晚天氣清涼,下午部份時間有陽光,天氣乾燥。上周五美國公布非農數字勝期,美股低開高走,道指雖然一度跌逾300點,最終倒升34點收市,標指跟納指跌幅亦收窄至0.12%及0.18%。目前標指仍未能突破4100阴力,喺技術指標超買下,估計標指繼續喺3900-4100之間上落。近日美股成交有所縮減,可見資金喺高位已唔再積極追貨,不過VIX反映市場恐慌減退,而淡友亦逐步投降平倉,美股喺高位呈膠著狀態,但缺乏再拉升動力。

10年債息回落至3.5%,反映市場推算明年至2024年美息或有超過1%減息空間,不過通脹受控甚至回落,先合符聯儲局減息條件,至於通脹點為知真正見頂回落,就要睇住個核心PCE,當PCE回落至3%,美聯儲局就有條件減息,而當PCE回落至2%以下,通脹正式消退,聯儲局就可能要以減息刺激經濟。目前情況美股正處於牛熊分屆嘅分岔路上,而目前就業市場表現仍然理想,雖然科技企業大量裁員,但之前受疫情影響最大嘅餐飲及酒店仍有大量空缺,喺就業市場仍然係有工等人做嘅情況下,美國經濟前景並不悲觀。

另一個令美股甚至全球股市可能逆轉勢,由熊入牛嘅因素係美元表勢,當美匯指數強勢時,喺9月及10月份大量資金撤離新興市場,以亞太區股市最傷,不過當10月中美匯指數跌破110時,資金流向出現逆轉,上月即見資金從新入流入新興市場,而人民幣近日回升,今日更重返7算水平,人民幣走勢逆轉利好中概股,上周五美股雖然下跌,但中概股表現仍然強勁,帶動港股喺上周五晚ADR及夜期衝上萬九水平。

港股上周高見19237後回落,調整至18600水平,當晚夜期已借中概股升勢再挑戰19000水平,如無意外,今個星期有機會挑戰19500-19600水平,並嘗試回補9月中下跌裂口19500-19600,但該水平阻力較大,挑戰失敗或再回調,但只要18000水平得保,後市仍然向上,而下一個目標將會係20000-22000,當港股能成功企穩20000-22000水平,料可走出熊市,再次步向牛市。