示意圖。Unsplash圖片
示意圖。Unsplash圖片

中小學生恢復面授上課已經超過兩星期,有家長在Facebook發文大呻,表示兒子的學校自復課起已經每星期有超過兩次默書,功課量更十分多,放學更要應付學校的興趣班,直言學校「chur到班學生乾咁滯」,引起其他家長熱議。

這名家長在Facebook專頁「家長 Secrets」投稿,指兒子就讀一間男校小學,自復課第一日開始,每天要應付堆積如山的功課,而且每星期更有兩至三次默書,放學後更要用zoom上學校樂器班。家長批評學校的安排太過份:「海綿都要放吓水先可以再吸水,更何況小學生,校長認為學生係萬能咩?」

家長又表示,學校在停課期間用video教學,講解十分詳盡,但復課後面授老師卻變成「求其教書」,上課大部分時間都在責罵學生、做改正,「每堂得半小時,一個上午上足8堂,小息得一個,全世界趕考試範圍,仲有兩星期考試,書都未教完。」

帖文引起其他家長討論,有家長留言認為很多學校老師都怕再停課,所以「谷得就谷」,有人質疑:「小朋友停咗大半年學本身已經要多啲時間warm up,結果老師竟然再教快啲,唉,結果都係家長受難,要自己不停在家重教重學,咁樣對小朋友真係好咩?」、「學校唔可以放棄一次考試或者默書嗰啲嘅咩?」