【Juicy叮】不解公屋戶安於玩樂少諗將來網民見解惹熱議

港聞

更新時間：16:24 2021-02-22
發佈時間：15:20 2021-02-22

有網民不解為何有公屋居民滿足於當下環境。資料圖片

網上討論區「親子王國」有網民，問現今公屋居民大多數是否都耽於逸樂、少籌劃將來，引來網民討論。

發文者說，留意到有人提出，「住公屋，可以好捨得食、玩，講到好正咁，但又話自己儲唔到首期」；「都有公屋，點解要抽居屋，都係同一間隔」。發文者大為不解，雖知公屋都有上進人士，但「係咪住公屋嘅心態（諗住住一世那些），都係今朝有酒今朝醉，好少諗將來呢？咁第時老咗退休，係咪多數靠政府，又或者有病痛時，就去政府醫院？佢哋百年歸老時，公屋會被收返，咁仔女點？」

有公屋出身的過來人說，「我以前都係住公屋的，之後屋企人透過綠表在自由市場買左居屋，公屋和居屋的人和環境真係差好遠，我記得住公屋時，日日夜夜都會有人吵架，仲夾雜好多粗口，之後買咗樓，搬咗屋，真係好清靜，由公屋的一層30户到現在一層先10户，連我屋企人都好開心，終於可以安靜地過日子。」

有人指，「識幾個住公屋親戚朋友，心態覺得畀咁小錢可以住市區，老咗或失業又有政府養，做咩要自己買樓咁蠢，又住得遠，咁遠唔係人住，點返工？每次聽到呢句就火」、「我身邊朋友只有一個住公屋，佢又真係唸住將來啲女結婚，祈望男家有私樓，自己個女公屋出身，又無物業，但又有要求，啲人思想好奇怪」。亦有人指出不少富貴人家藏身於公屋之中，「香港真係好多人濫用公屋，公屋富戶停車場多名車，好多人住公屋都好有錢，我識得，親眼見。僱2個工人，飲飲食食，旅行豪華團才參加。」

有網民不解為何有公屋居民滿足於當下環境。資料圖片

有人認為不應該一竹篙打一船人，稱「不論性別、背景、家產、學歷，都有各式各樣諗法嘅人，重點係自己承擔返責任，唔好埋怨政府埋怨別人」有人說，「真係唔少人會濫用公屋，打工咁多年見過唔少個案：有啲單親刻意搵少啲錢嘅part time等公屋（原本係做開全職就超過咗限額）；另一半份工係出現金，報無業，排到單人公屋，結咗婚即刻在申請3-4人單位，排到之後只係用幾十萬就買咗；個老公開公司揸靚車，但就做好盤數，只係交好少租繼續一家人住公屋...而我又認識有幾個，一個大家庭逼喺個幾百呎公屋，資產收入超過咗少少，咁就無緣申請。其實我知好多嘢都有灰色地帶，正常善良人係唔會去觸碰，只有貪小便宜有心之人先至會可以利用到。」

有人覺得，「我睇法係先苦後甜或先甜後苦，有能力嘅，居屋環境應比公屋舒適，後生有能耐捱吓，又冇打算生小朋友，到退休時，有咩事都仲有層樓為資金，香港生活成本高，選擇到國內退休都仲可以出租層樓，繼續住公屋，現時生活輕鬆，但到老年時只能靠政府，萬一福利政策有改動，亦只能接受」、「有能力嘅都會想有自己樓，咁私樓買唔起咪買居屋囉，雖然係同公屋間隔差唔多，但都係嗰句，起碼係自己樓，不過如果係我，我有公屋會住一世，買唔買居屋我都冇乜所謂」。