【Juicy叮】小鐵漢去迪士尼玩被指用名氣插隊 父反擊:你葡萄佢有傷殘證?

港聞
更新時間:15:59 2021-04-13
發佈時間:15:30 2021-04-13
患先天性心臟病的「小鐵漢」Kansas,經過5次植入心臟起搏器手術後病情穩定,近日更終於如願到迪士尼樂園玩,但一家人卻在園內被指「用名氣插隊攞著數」,令小鐵漢的爸爸相當不忿,並於事後在網上出文反擊,引起網民熱論。

小鐵漢爸爸Jayco在「巴打絲打『00九吹專區』Facebook Club」上出文,指昨日一家人到迪士尼樂園玩,期間有人認得他們,並指他們「用小鐵漢個名向職員攞著數插隊」,更當場指指點點。Jayco指,過往都曾經有人在媽媽Group上指「小鐵漢好巴閉,連隊都唔駛排」。

Jayco表示,小鐵漢因患有嚴重的心臟疾病而曾接受多次手術,在醫學上被定義為「身體機能或永遠受損」,故持有殘疾人士登記證。而迪士尼有關愛機制,只要是殘疾人士登記證持有人,就可以在入園時得到一張賓客援助服務卡,同行的5位親友都可一起使用,除了找卡通人物拍照及少數機動遊戲外,其他都不需要排隊。

Jayco批評,「成件事根本唔值得你去葡萄,你葡萄小鐵漢有傷殘證?」他又指,不是想說明「殘疾人士係大哂有乜乜特權」,而是希望大家知道「小鐵漢因為健康上嘅不幸,所以可以幸運地喺迪士尼嘅關愛基制下唔使排隊,正如你健康上冇不幸,先可以有幸喺迪士尼排隊一樣」。

帖文引起大批網民關注,不少人留言力撐小鐵漢,「真係唔需理啲無文化同愛心的酸民」、「最緊要小漢鐵開心健康,唔好理啲見識小嘅人」、「小鐵漢爸爸媽媽唔需要理會呢啲人,最緊要享受同小鐵漢玩,開開心心」;亦有人留言感嘆:「長期病患人士其實係生活中有好多不便,一啲唔清楚長期病患者辛苦嘅人係唔會明白,以為人哋有得拎著數,而呢啲著數當事人寧願無好過有,因為長期孭住個病係身,係一件好痛苦嘅事」、「我都係攞呢張咭, 我情願唔攞呢張卡啦,攞得呢張卡都冇好嘢,其實嗰個葡萄有冇諗過㗎」。
資料來源:巴打絲打「00九吹專區」Facebook Club