左:李澤鉅、李澤楷。資料圖片
左:李澤鉅、李澤楷。資料圖片

李澤鉅及李澤楷旗下機構,近日舉辦經濟峰會,一如過往都有不少高官畀面出席,如特首林鄭月娥、財爺陳茂波、金管局行政總裁余偉文等,多名財金界猛人亦捧場。然而在疫情影響下,只有與會講者同嘉賓可以出席現場,至於觀眾就只能上網睇直播。不過,今年會議就有兩個相當有分量的稀客,突然前後腳出現,令在場工作人員好緊張,仲話好大壓力。

據當日有出席的人士話,呢兩個重量級人士,正是長實樓神趙國雄,同以做「大刁」見稱嘅電盈老闆小小超李澤楷。趙國雄出席呢啲經濟峰會好少見,小小超出席本地經濟峰會,就更係少之又少,小小超親自接待特首同財爺,仲同趙國雄由頭坐到尾,的確唔話得。



有專欄作家話,兩人同台亮相,有點同場較勁嘅味道。事實上,李氏兩兄弟各有各做,一個以賣樓為主,公用事業零售港口業務,更係遍布全球。小小超就以電訊及保險為主,另外仲有基金生意,兩邊根本無乜衝突,極其量只有電訊業務雙方有競爭。

有與會中人話,會唔會係呢排長和旗下3香港狂谷5G網,仲話自己5G網強,覆蓋面大,可能就咁激發起小小超心中那團火,要捍衞其電訊一哥之位,故呢位大忙人,不單止高調出席峰會仲坐足全程,顯示其江湖地位。

其實兩兄弟旗下電訊業務競爭的確相當激烈,都坐市場第一把交椅,究竟係3香港客多搵錢多?定係CSL品牌煞食而客似雲來?真係好似睇「暗戰」咁,唔睇到尾都唔知結局。等多半年派中期成績表,到時就自有分曉。