家人透露石樂蕎的送別儀式已於昨日低調進行。fb「尋找行山少女石樂蕎」圖片
家人透露石樂蕎的送別儀式已於昨日低調進行。fb「尋找行山少女石樂蕎」圖片

居石硤尾南山邨的24歲女西廚石樂蕎,上月失蹤3日後被發現在飛鵝山自殺崖墮斃。其家人今日凌晨在fb專頁「尋找行山少女石樂蕎」發文,指送別儀式已於昨日(6日)低調進行,同時感謝參與搜救的人員,和提供各種支援的人士。

貼文總結石樂蕎的一生,指「短短24年,妹妹嘅一生很短暫。雖然很短暫,但係活得很認真很精彩。石樂蕎妹妹,願你將快樂散播到另一個地方,願你下一個旅程更精彩。」



貼文還透露,石樂蕎「戴住喜愛既漁夫帽,一身文青裝束,連同佢喜愛嘅烹飪書,工作嘅廚師制服,同埋兒時最愛嘅毛毯陪伴上路。」

帖文全文:

大家早晨。

昨日送別妹妹最後一程。

連日黎都有朋友慰問同埋問及會否有公眾弔唁,大家對妹妹既關心慰問已轉達到家人,大家有心。

因為家人希望低調處理,所以送別儀式僅告知家屬,妹妹既朋友以及公司同事出席。

妹妹戴住喜愛既漁夫帽,一身文青裝束,連同佢喜愛既烹飪書,工作既廚師制服,同埋兒時最愛既毛毯陪伴上路。

妹妹本身無宗教信仰,所以儀式以簡樸為主,靈堂上擺有親友既花圈,以及播放妹妹生活照既 slideshow,有妹妹既同學朋友送上紙鶴,家人及朋友亦有為妹妹準備左佢鍾意既食物。

從妹妹既相片中,我揀左我最喜愛既呢一張放上黎。姐姐問我點解鍾意呢張相,我答因為我覺得相入面既妹妹好開心,佢好享受自己做緊既事。

喺朋友眼中,妹妹好關心朋友樂於助人,更加係一個開心果。妹妹十分獨立,同家人好親密,但就比較少講自己心裡面既想法。妹妹 asso祗係讀左半年就決定出黎做野,當時佢問姐姐意見,姐姐堅持自己一定要完成 degree, 不過佢就同妹妹講,佢地係好唔同既人,所以如果妹妹決定唔再讀,佢完全明白同支持。

因為熱心助人,所以成為無國界義工;因為熱愛遠足露營,所以修讀左兩個有關課程;因為熱愛烹飪,所以參加藍帶獎學金大賽,而且成功進入決賽。妹妹最後就職於 Grand Hyatt 餐飲部,因為勤奮乖巧所以受到上司同埋前輩既愛戴。

短短 24 年,妹妹既一生很短暫。
雖然很短暫,但係活得很認真很精彩。

石樂蕎妹妹,願你將快樂散播到另一個地方,願你下一個旅程更精彩。

最後要向群組所有朋友再講一聲多謝,你地用左不同形式去支持家人同妹妹,實在好感激你地。有心人,多謝你既漁夫帽。

多謝消防署及警方,飛行服務隊,民安隊。
更加要多謝西九龍總區失蹤人口調查組,特別係 madam 候,對家人既耐性以及所有協助。

多謝 郊野義務搜索隊 CVST 所有隊員,多謝 Jossie 同 Tommy 提供各種實際以及精神上既支援。

多謝 Grand Hyatt Director of Human Resources 馮小姐,由第一日得知妹妹失蹤,多次致電慰問以及前來送別妹妹。

由於需要致謝既朋友仲有好多,所以我留待姐姐再向大家道謝

附加 

因為尋晚好攰,所以真係有幾位重要既人未致謝!

多謝「一切從簡」團隊為妹妹後事奔波,多謝 Winnie 耐心詳細解答家人所有問題及打點一切。多謝伍桂麟先生為家人提供專業意見,同埋好多謝伍先生抽空前來送別妹妹同慰問家人。