【Kelly Online】 橫掃國際網賽壯年組 吳光正封雙料冠軍

前九龍倉集團主席吳光正形象健康、正面。Kelly知道呢位成功嘅商人退休之後,熱愛各類運動,例如網球、遊水、滑雪同埋潛水等等。佢最近仲參加咗一個國際網球賽事,勇奪七十歲或以上組別嘅單打同雙打冠軍,認真犀利!

七十四歲嘅吳光正最近參加由香港元老網球總會和香港網球總會合辦嘅「香港國際超壯年網球公開賽2021」,喺七十歲或以上男子組別中,勇奪單打及雙打冠軍,分別獲頒一個獎座同埋二百蚊美金。小妹知道吳光正對於獲獎感到好興奮,而且佢每年都會參加唔同運動比賽,希望鼓勵更多長者勤做運動,保持健康嘅體魄。



吳光正喺一五年辭任九倉集團董事局主席嘅職務,退休之後有更多時間專注做運動,小妹都好佩服佢嘅毅力!