【Juicy叮】市民斥阻地球轉倡政府上門強打疫苗 網民反駁:顧自己有乜問題

港聞
更新時間:16:47 2021-05-12
發佈時間:15:50 2021-05-12
應否強制接種疫苗在社會引發爭議。資料圖片
應否強制接種疫苗在社會引發爭議。資料圖片
隨住疫苗氣泡及旅遊氣泡陸續推行,市民接種疫苗人數仍然未見大幅增加,不少人都是十五十六靜觀其變。有市民對此感到不滿,發文聲討拒絕打針的人自私兼阻住地球轉,更提出強制打針,引來網民反應兩極。

有網民在「親子王國」發帖文,斥責「連美國都準備可以除口罩,香港卻仲要唔知等到幾時。一日都係個啲可以打針而唔打嘅阻生哂!雖然唔應該咁極端,應該先用誘因谷針,但我支持政府同警察必要時上門捉人打針,等香港重回2018年嘅景況。」

對疫苗存疑的網民隨即反駁,「我全家冇打,地球咪一樣轉緊」、「點解唔可以考慮自己? 而家係講緊打啲藥入身體呀! 如果打咗針有咩事, 係咪你照顧人哋全家? 你打完無事唔代表人哋打完無事, 就算事前諮詢醫生, 醫生都唔敢百份百話可以打, 都係叫你自己決定返架, 唔好成日覺得唔打針嘅人一定係自私, 我覺得果啲為咗快啲通關, 想去旅行而夾硬迫人打針果啲先係真自私!」、「自己身體好一般,真係怕打完死咗小朋友無人照顧呀」。

一些已經接種疫苗的網民則留言,「冇計,香港自私嘅人太多,個個只考慮自己」、「咁你有冇考慮下自己父母或年幼嘅子女?佢地啲 真係打唔到針嘅人士被你惹到會點?年老嘅死亡率有幾高呀?」、「最好笑係一話打針,我身邊突然多咗好多人話自己有長期病,但平時完全無提過又唔駛食藥」、「唔打針係值得批鬥喎。好多細路過唔到正常校園生活,好多中港家庭分離,更唔好講失業破產,真係剩係冇得通關旅行聚會咁簡單?!」、「講信唔信個政府呢啲就多餘嘅。唔LIKE科興咪打復必泰囉,但啲人就淨係識踩科興,一叫佢地打復必泰就鳥獸散」

也有網民指不能強求,「打唔打自己決定,一家唔知一家事,打咗同唔打嘅都唔應歧視批鬥對方」,「其實我一直都好唔想打, 都係諗住睇定啲等到最後先算。 主要都係驚嚴重副作用,面癱之類。 有冇效都係其次...如果打咗疫苗有機會可以豁免或者唔使隔離咁耐。 所以問咗朋友意見, 聽完覺得都有信心, 而且遲啲如果去旅行可能都一定要打,咁不如而家打。 未打算打嘅朋友都認真考慮一下快啲打。」

帖文轉載自《香港唔打針既人真係阻住地球轉!》