吳諾弘(左起)、崔浩然、張家朗、張小倫Instagram直播截圖
吳諾弘(左起)、崔浩然、張家朗、張小倫Instagram直播截圖

港隊「金牌劍神」張家朗人氣飈升,昨晚(4日)與隊友吳諾弘、張小倫及沒有出戰奧運的崔浩然一同於Instagram開Live互相爆料,其間笑料十足,張家朗更被隊友大爆擇偶條件,整個live長達約1小時,引來1.9萬人觀看。

昨晚的ig直播由吳諾弘發起,初時他與張小倫傾偈,互爆花名,其後張家朗及崔浩然陸續加入。張家朗不斷被兄弟爆料,其間張小倫率先爆平時稱呼張家朗做「Jer Jer 」,大家問是否有特別意思,張家朗隨即澄清:「因為我姓張咋嘛,冇其他意思!」張小倫其後又指吳諾弘花名叫Kobe,指吳諾弘在團體賽時傷腳,在場邊的師兄們大叫Kobe,想提醒吳諾弘好似NBA高比拜仁一樣不要放棄。吳諾弘其後再大爆張家朗喜歡沖涼時高歌,叫張家朗即席表演,但張家朗立即耍手擰頭表示:「唔得呀!」



張小倫又指他們在酒店內非常悶,所以第一次開live,但張家朗笑笑口立即表示:「大師兄迫我咋!」,笑料十足。有網民問起花劍比賽中獲銀牌的格羅素錯拿屬於張家朗的金牌公仔,張家朗非常尷尬回應:「喺台上面已經知道隻公仔俾人拎咗,但唔好意思(要求交換),唯有落到台影完相,就叫在場人士幫手換返隻公仔」。

有網友其後留言,希望知道張家朗的感情狀況,初時張家朗都不願多談,其後才親口透露自己是單身。吳諾弘其後代答:「佢(張家朗)嘅理想型......首先一定要返咁上下身高,跟住是友善、乖、孝順,對佢好囉」,張家朗便稱:「都係嗰啲啦。」張小倫則補充道:「最緊要唔好煩佢,忍得佢,忍得到佢成日飛,唔喺香港,你知而家香港好多港女啦。」

全程張家朗表現含蓄,不斷笑笑口,又指張小倫等人「講咗等於無講」,吳諾弘被張小倫問理想的另一半條件時,吳諾弘即刻笑稱:「我女朋友咪係我嘅理想型囉!」有網民再問張家朗是否很累,張家朗笑住話:「我好精神呀,我個樣係咁,啲人成日以為我好眼瞓,其實唔係!」有人問張家朗對眼有幾大,張家朗答:「我對眼好細」,隨即擘大眼靠近鏡頭,相當搞笑。

吳諾弘、崔浩然、張家朗及張小倫昨日於ig開live大爆對方笑料。Instagram直播截圖
吳諾弘、崔浩然、張家朗及張小倫昨日於ig開live大爆對方笑料。Instagram直播截圖