Vivian同Cong Quartet合奏嘅《明天,你好》,近日就喺網上瘋傳。影片截圖
Vivian同Cong Quartet合奏嘅《明天,你好》,近日就喺網上瘋傳。影片截圖

香港健兒昨天在東奧連奪兩銅,全城矚目,但其他香港運動員即使無牌,一樣表現出色,令人刮目相看。好似重劍一姐江旻憓(Vivian),失落奧運獎牌,但仍然有好多粉絲錫佢,近日不斷將佢嘅威水史放上網,原來賽場上劍藝非凡嘅佢,場下仲係一名可愛教主,更加超級多才多藝,網上瘋傳佢同一隊弦樂四重奏演奏《明天,你好》,好治療心靈,令人佩服呀!

江旻憓賽場上劍藝非凡。資料圖片
江旻憓賽場上劍藝非凡。資料圖片

Vivian除咗打劍叻,原來仲係多元化發展,動靜皆勁,識打跆拳道,又彈古箏、畫畫同埋跳芭蕾舞。學業亦威水,Vivian之前休息養傷嗰陣,自己喺網上攻讀中國人民大學法律碩士,今年喺中大攻讀法律博士。

文又得,武又得嘅Vivian,估唔到鋼琴都有演奏級,佢同Cong Quartet合奏嘅《明天,你好》,近日就喺網上瘋傳,好多人like。佢喺片中分享,自己三歲嗰陣被媽媽迫學琴,細個練十分鐘就唔想彈,但反而愈大愈嚟鍾意彈琴。Vivian話,每次劍擊比賽前最想彈琴,除咗紓緩壓力,仲有助佢練習人劍合一。