撐《媽媽的神奇小子》 田二少帶孫女為善

港聞
更新時間:01:14 2021-08-30
發佈時間:01:08 2021-08-30
田北辰直言被劇情感動。資料圖片
田北辰直言被劇情感動。資料圖片

立法會議員田北辰前日帶同兩個孫女,支持扶康會舉辦嘅《媽媽的神奇小子》慈善場,適逢東京殘疾人士奧運期間,香港派出24個好手參戰,當中乒乓球運動員王婷莛已為香港贏得一面銅牌,而其他選手亦在不同賽場拼盡全力。田二少在fb分享感受,話這個時候帶小朋友認識更多殘疾運動員嘅經歷、如何克服困難,非常有意義。

對於這部電影,田二少以「三最」講述觀後感。首先係「最感動」,亦都係電影「主菜」——神奇小子蘇樺偉係點樣煉成?除咗刻苦努力,更關鍵係佢有個神奇媽媽,一直不放棄,一步步陪住佢奮鬥,見證佢贏在終點綫一刻。

而「最深刻」的,是神奇小子參加北京奧運前,一心只諗住要突破個人紀錄,田二少話呢點都有啟發性:執着於同人比較,只會令自己唔開心;同自己比賽、不斷爭取個人最好成績,才是對自己最好嘅交代。

至於「最心噏」,則是戲入面講,神奇小子之後無奈退役,轉任月薪7000元的速遞員,因為繼續訓練,政府津貼只有3000元,好難維生。田二少話,一個代表香港拎金牌的運動員,如果月薪連速遞員都比唔上,仲點推廣精英體育?政府應該盡快再檢討,增加津貼,令運動員可以無後顧之憂,專心比賽。