九龍城重建|海味鋪開業66載 老東主不捨街坊

港聞
更新時間:08:42 2022-05-28
發佈時間:08:42 2022-05-28

市建局昨日宣布啟動九龍城衙前圍道/賈炳達道發展計畫,市建局職員昨早起進行凍結人口調查,並在樓宇大閘和門口貼上通告及規劃圖,供居民和商戶參閱。有年過九旬的海味店店東表示,由一九五六年開業至今,見證九龍城由人流稀少變得繁忙,街坊三代都過來買海味,希望能原區安置。

「幾代人都幫襯我」

  面積逾千呎的金城海味,已扎根區內六十六年,店面掛住六、七塊至少超過半米的魚翅,櫃上擺着一排戰前已製作好的花膠。現年九十一歲的林城是該店店東,他笑稱店內「好多古物」,更憶述「同啲街坊幾廿年,幾代都幫襯我,由媽咪介紹個女,再介紹個孫」。

  他慨歎,政府決定重建,小市民只能服從,明白「今時唔拆遲下都要拆」,但仍對九龍城深感不捨,盼望能原區重開新鋪。他又透露,每月租金約十二萬元,大呻現時生意難做,時好時壞。

雜貨店第三代憂失人情味

  旁邊同在項目範圍內的潮發白米雜貨開業逾七十年,第三代傳人邱太十年前放棄在中環做OL,承傳潮州小食手藝,「潮州粿我哋自己做,端午節糭都係自己包」。她對重建消息感到十分突然,「我哋啲舊鋪買少見少。」聽聞市建局有意邀請特色小店重置,但她仍憂慮日後當區變得商業化,失去人情味,「有時公公婆婆幾日嚟一次,揹好多野,咪俾張凳佢坐吓,請佢食茶粿,但商業鋪就寸金尺土,去出面未必有呢啲。」

  至於六十六歲的林太,一家七口居住在南角道的唐樓單位逾二十年,打通共七個單位,裝潢非常寬敞,多次強調「好想繼續住喺度」,形容重建是意料之外。她續稱,在港島區也有物業,但獨愛九龍城社區,因為交通買菜便利,「呢度比較街坊啲,可以着對拖鞋落街」。

立即下載|全新《星島頭條》APP:https://bit.ly/3yLrgYZ