有私家車駛近客貨車,為對方拉開擋住其視線的大紙板。FB影片截圖
有私家車駛近客貨車,為對方拉開擋住其視線的大紙板。FB影片截圖


社交媒體Facebook群組流傳一段車Cam影片,當中顯示一名好心司機「拔刀相助」的畫面!事發於昨日(3日)下午1時許,一輛貨車沿觀塘繞道快線往油塘方向行駛,至近牛頭角絲寶國際大廈對開時,一塊巨型紙板突然從前面襲來,遮蓋客貨車車頭。

客貨車司機的視線受阻,隨即減慢車速,但未有即時停車處理,反而繼續前行。此時,一輛私家車沿中線駛近客貨車,當時兩車相當接近,司機打開車窗並將右手伸出車外,將「不速之客」拉開,成功替客貨車司機解圍後,便由中線轉快線「爬頭」駛走。

影片引起不少網民討論,有人大讚私家車司機,「好少有咁大愛嘅司機喇!」、「感動人心」、「有技術,有善心」、「畀個讚你,有膽識有技術有善心」,更有人重提今年4月時一名電單車司機出手助電單車女「學神」拿走遮擋視線的膠布,指「懷念上次天若有情的鐵騎士勇救女士」、「上次係26(二轆)版,今次係46(四轆)版」、「同上次九龍灣26司機一樣咁有愛」。

不過亦有網民認為私家車司機的行為相當危險,亦有可能會連累後車,「如果掟咗落片主度,係咪仲係好人好事好技術」、「佢咁樣掉返低,後面中咪又大獲」、「下次個技術差有樣學樣,走去幫人就變害人」、「今次情況唔太建議咁做」、「又無撞住司機前面視線,咁做好危險」。有人表示若行車時遭物件遮擋視線,應打死火燈,慢慢停下處理,但就有人反駁表示「佢喺快線,仲要官繞快線,要靠左才停,但偏偏左邊被擋」。

另外有不少人就關心廢物於行車路隨風飄揚的情況,「好心交通部就多加留意檢控廢物回收,唔落網垃圾紙張飛到周圍係嗰啲貨車啦」、「呢架車不是第一次在繞道掉紙,上個月都見過佢係繞道掉紙」、「觀繞真係好多垃圾,啲垃圾車成日玩Mario kart」。

 

影片來源:「車cam L(香港群組)」FB

星島新聞集團慶回歸25周年專題網站,請即瀏覽
立即下載|全新《星島頭條》APP:https://bit.ly/3yLrgYZ