Juicy叮|婆婆身兼母職幫孫女買M巾遭考起 港女目擊過程感心酸


買M巾除了對男性來說是一個大考驗,對年過70歲的婆婆來說,亦是一大難題。近日有港女在討論區發文,主題為「老公幫老婆買M巾so sweet  阿婆幫孫女買M巾so心酸」,指早前在大型連鎖店購買衞生巾時,見到一名身穿清潔公司制服、年約70歲的婆婆為孫女買衞生巾,「婆婆問我手拎嗰包M巾係點用嘅,我係呆一呆~點答…後來了解後,原來孫女無晒存貨,send相畀阿婆叫佢去買,但阿婆又唔小心del咗張相,又唔再問孫女,所以係堆巾櫃徬徨中。」

樓主憶述婆婆向她大吐苦水,指之前已替中一的孫女購買安全褲,雖然價錢昂貴,但亦按要求購買,「今日話日用都無,所以叫阿婆去買,我問點解佢唔自己嚟買,婆婆答:『叫我買就我畀錢嘛。』」

樓主其後指婆婆雖瘦削矮小,皮膚因工作而黝黑,但仍精神奕奕詢問M巾知識,「雖然時不時會吐嘈孫女2句,但看她表情是充滿愛,嗰刻令我有點心酸,希望婆婆的愛是雙向的」。最後婆婆聽從樓主推薦,購買3包M巾,同時1包洗衣液,並希望她的孫女不會太高要求。另外,樓主又稱讚店員,知道婆婆不想浪費買膠袋時,熱心幫婆婆找到個乾淨的紙箱盛載。

來源: 香港討論區

星島新聞集團慶回歸25周年專題網站,請即瀏覽 
立即下載 | 全新《星島頭條》APP :  https://bit.ly/3yLrgYZ