肥男美孚站月台扮「唱錢」搶港女$10 街坊：呢個係慣犯！
發佈時間：22:21 2022-08-10
美孚近日發生一宗公然搶錢的事件，非常猖狂！有女街坊近日在社交平台發文講述親身經歷，指昨日在美孚港鐵站的月台等車期間，一名男子上前要求「唱錢」，當她打開銀包指自己僅得一張10元鈔票時，對方竟一手槍走往大堂跑去。有網民指該名男子為「慣犯」，經常在月台問乘客「唱錢」，當對方表示沒有「散紙」時便會遭佢大罵。
一名女網民於「Mei Foo 美孚」facebook群組發文，指昨日（9日）傍晚在港鐵美孚站往荃灣方向的月台等車，其間一名年約40至50歲，戴黑色cap帽、頭髮染綠色的肥男拿住一張$20的鈔票靠近，並向她詢問「有冇得唱散」，「我打開銀包睇， 咁啱未㩒錢，得兩張$10，我話『sorry ， 得一張$10』，個男人一手攞咗， 跟住扮有電話即搭扶手梯衝上大堂，追都追唔切」。
事主憶述事件感到氣忿又無奈，直言「完全冇諗過可以咁樣搶」，又指自己當時趕住外出，損失的金額只是$10，「諗住算鬼數」，後來覺得不應這麼容易放生賊人，於是將自己的經歷放在facebook，希望大家小心提防。
不少網民紛紛留言，指事主遇上的肥男是一名「慣犯」，經常以同樣手法搶錢，「佢經常話唱錢，我上次無仲比佢X！」、「我都遇到，當時我趕時間接放學，叫佢自己去商鋪去唱，佢居然鬧我，我都覺得好嬲，依家先知原來佢係呃錢黨」、「我在月台遇過這男人，我話無散紙，被他鬧」、「我半年前都遇過佢，又係問有冇散紙唱，我準備抽手入去攞銀包的時候，佢又話咩個八達通無錢，一陣又話用手機app過返畀我，我見勢色唔對，銀包都唔攞就話冇，佢就一路行上電梯一嗰係咁鬧我」。
有多名網民認為遇到涉事肥男應該立即通知職員並報警，不應不了了之，「其實佢醒呀，搶$10你都唔會話真係報警，如果佢勤力啲，每日搶100個人就成千蚊㗎」、「咁有冇同地鐵職員講？今次10蚊，下次可能……至少睇咗閉路電視，有個record（紀錄）」。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
