搭港鐵衝閘得BB車成功上車 港媽獨留月台後續峰迴路轉

港聞
更新時間:21:15 2022-09-30
發佈時間:21:15 2022-09-30

雖然港鐵每天都在廣播,甚至有職員站在門邊呼籲大家不要衝車門,然而衝閘的情況每天仍在上映。有網民在社交平台發文,指日前目睹一名年輕女生推住BB車衝入車廂,更在車門關上一刻發力將BB車推入車廂,自己卻站在月台,幸車廂內的乘客用手擋門,否則便人車分隔。

該名網民於facebook群組「將軍澳主場」發文,指周一(26日)晚上大約10時10分在港鐵將軍澳站見到一名年輕女子推住BB車等列車,其間她一直玩手機未有上車,直到列車要關門時突然發力將BB車推入車廂,「正常人都會即刻拉番架BB車出嚟,但佢冇咁做繼續衝閘,當架BB車手推位過哂閘門嘅時候,度幕門已經差唔多關哂,但個女仔仲喺月台,正常反應梗係揾手揳住度幕門,但個女仔竟然發力推架BB車入車廂之後立刻縮手,咁架BB車就入咗車廂,而佢就戇居居企咗喺月台.....」。

樓主其後指車廂關門的時間較月台閘門遲,車內私乘客立即出手相助,用手揳住車門令車門同閘門重開,該女生才可上到列車與BB團聚,否則BB車便會隨列車開走。其後樓主又指有其他目擊者指當時BB車內有BB,直言「真係好擔心佢日後會遇到幾多危險」。

不少網民紛紛留言,指「睇文字都睇到一額汗」,認為事件中的女子「生仔要考牌,推嬰兒車亦要考牌」,「手機低頭族!其實都唔明,手機睇少陣會死?如果因為睇手機而發生意外,真係遺憾一生」、「好多人係會因自己愚蠢嘅行為而犧牲,救不了」、「做老竇老母真係要考牌」、「以為推走BB就唔使湊呀?」、「證明生仔真係要考牌」。

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ