車cam直擊|69歲鐵騎士帶P牌仔瘋狂穿插「訓彎」 熱血交通警怒斥:你點賠個仔畀人?

港聞
更新時間:18:51 2022-11-08
發佈時間:18:51 2022-11-08

日前大埔汀角路往大美督方向有至少5架電單車急速馳至,多次在行車線間左穿右插,其間更在多個彎位做出「訓彎」動作,險象橫生。有交通警目擊驚險一幕後展開追截,終截停所有人,更直斥帶頭的69歲退休鐵騎行為魯莽,妄顧他人的安全,「你玩到好似舞龍咁喎,你69歲人仲咁揸法,有冇搞錯呀?」「條命係好緊要架,條命你賠唔番畀人阿媽呀!」

昨日(7日)網上流傳多段車cam影片,拍攝日期為10月30日下午3時許,相信是由帶頭電單車所拍。片中所見,多輛電單車沿汀角路往大美督方向行駛,至汀角路及南運路交界燈位時,帶頭的電單車在車與車之間左穿右插,又在多個彎位做出「訓彎」動作。其間,一名交通警於汀角路截查私家車,驚見電單車做出如此危險的駕駛行為,立即上前追截,最終在雅景花園附近截獲多輛電單車。

交通警發現帶頭的鐵騎士竟是一名69歲退休男子,而車隊更有「P牌」的新手司機,隨即怒火中燒,直斥對方妄顧他人安全,又指若發生意外後果不堪設想,相當勞氣,「你玩到好似舞龍咁喎!你69歲人仲咁樣揸法,有冇搞錯呀!」、「你知唔知新娘澤入面啱啱死咗兩個呀?就係你呢啲咁嘅人咁揸車呀」、「我都唔明點解你要咁樣,即係你型,啲車跟住你玩?你仲要揸到格林披治?」、「你死唔緊要呀,啲後生廿幾歲咋,佢哋byebye咗,你於心何忍呀阿叔?」、「條命係好緊要,你點賠個仔畀人呀? 你有冇諗過呀?」

初時涉事的鐵騎士一度解釋自己假日玩車,所以一時興起,但最後亦承認自己的行為「真係過份咗」,感到非常慚愧,「阿sir你呢個教訓好直接…真係好刻骨銘心」。

帶頭的69歲退休鐵騎士承認自己的行為「過份咗」。片段截圖
帶頭的69歲退休鐵騎士承認自己的行為「過份咗」。片段截圖

不少網民認為大讚警員苦口婆心,每句都是肺腑之言,又希望其他駕駛者可以注意安全,為自己及家人著想,「其實阿sir大可以全程唔出聲,你死你事抄完X你二句就算。難得在阿sir咁有心咁熱血企喺你嘅角度同你說教,其中字字鏗鏘,句句都駁唔到入到你應一應」、「阿sir 咁勞氣鬧你,都係唔想你咁快去投胎,真正鬧你係想你好」、「阿sir 好有heart,唔係打份工嘅心態」。

警方表示,新界北總區交通部執行及管制組人員10月30日下午約3時30分在大埔區進行巡邏期間,發現5輛電單車沿汀角路往大尾篤方向高速行駛,遂上前截查。人員在汀角路72號對開截停該5輛電單車,並即時提醒有關電單車司機要遵守交通規則,以確保道路使用者安全。另外,人員發現其中兩輛電單車懷疑被非法改裝,涉嫌違反《道路交通(車輛構造及保養)規例》,遂把該兩輛電單車送往大欖涌車輛檢驗中心進一步檢驗。

 《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ