潤發倉三級火｜逾3600人需要疏散長者坐輪椅、居民攜貓合力逃出生天

突發

更新時間：17:35 2023-03-24
發佈時間：17:35 2023-03-24

長沙灣潤發倉發生三級大火，現場一帶煙霧瀰漫，附近兩個屋苑及5間學校需要緊急疏散逾3600人，多名居民隨即帶同寵物貓狗疏散至地面暫避，另有多名長者疏散到深旺道行人路，部份人更需要坐輪椅。民政處現時已開放深水埗體育館作臨時庇護中心，予有需要的市民使用，目前有30人已前往臨時庇護中心，其後部門人員通知居民可返回單位後，深水埗體育館晚上8時前清場。

現場所見，附近凱德苑等居民緊急疏散至深旺道行人路，目測有多名居民為長者，其中更有人需坐輪椅，要附近鄰居協助逃生。在醫院工作的黎小姐得悉潤發倉發生火警，濃煙影響附近一帶學校及屋苑，於是立即返回寓所救貓，「突然咁樣真係好騰雞，臨時臨急都搵唔到貓袋，唯有搵架買餸車仔裝貓走人，不過唔知今晚點算，唯有見步行步啦」。

另外，居於凱德苑一高層單位的蔡先生指，初時太太聞到有異味，還以為廚房漏石油氣，「個窗有條隙，好大陣味，之後我哋閂晒窗，即刻搵手巾遮住休息，過咗半小時出面響alarm，警察拍門通知我哋有事，要我哋快啲撤退，我哋就即刻着衫，佢哋（警察）就推我哋落嚟，真係好多謝佢哋」。他指自己今年86歲，太太大自己3年，雖然自己需坐輪椅，但可以短暫企立15分鐘。對於現時警方不准居民返上單位，他坦言不擔心，「唔係明火，只係大煙，喺屋企睇覺得無乜嘢，落到嚟先知咁大煙，返唔到屋企都無咩所謂，銀包證件跟身，返唔到屋企咪去附近食住嘢先」。

----

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ