世界盃2022|專欄:加拿大出綫未絕望
世界盃2022|專欄:加拿大出綫未絕望


話咁快,首輪分組賽踢完!剛周三上咗去《賽馬日在線》做嘉賓主持,一邊望住賽馬,一邊睇住德國對日本嗰場精采賽事,真係睇到我同黃總拍手叫好!

德國今場嘅死症同阿根廷輸畀沙特一樣,都是有把握力同後防輕敵問題,呢個係今場輸波嘅重大關鍵,前線入球能力飄忽,似乎喺費歷克上任之後無好明顯嘅改善。嚟緊對年輕力壯兼狀態大勇嘅西班牙,隨時畀一隻又一隻「狂牛」撞散,唔通上屆分組賽出局嘅歷史會重演?

正如艾爾之前所講,三笘薰係日本嘅X factor,後備入替即刻令左路有晒活力。不過,要真正發揮X factor嘅威力,臨場調動嘅時機非常關鍵。領隊森保一今次做得極之好!先喺半場換入冨安健洋穩住防守,再趁德國球員體能下降,不斷換入前線有速度嘅球員,等待機會打反擊,為日本攞得相當重要嘅勝仗。唔通畀人鬧得多,先至會成才?希望「一哥」可以保持水準,「東洋武士」係可以走得更遠㗎!

另一場分組賽加拿大對比利時,亦令艾爾印象非常深刻。事隔四十幾年再殺入世界盃決賽周嘅加拿大,對住上屆季軍比利時,唔單止無退縮,上半場不斷嘅高位逼搶,令到對手後防風聲鶴唳。最後仍然輸波,皆因前線把握力唔好,球隊處理死球嘅部署一般,約拿芬大衞同艾方素戴維斯嘅狀態一般,進攻上貢獻唔多。難怪奇雲迪布尼賽後都話,加拿大球員呢場更加值得表揚。

加拿大今場畀全世界睇到,佢哋都可以踢到咁有侵略性嘅足球。之後只要保持今日嘅進攻模式,把握力好番啲,對住克羅地亞同摩洛哥,艾爾覺得仍有出線希望。 艾爾                                              
立即下載 | 全新《星島頭條》APP : https://bit.ly/3yLrgYZ