摩洛哥陣中係有唔少有質素嘅球員,當中艾爾比較欣賞踢緊巴黎聖日耳門嘅阿舒拉夫。AP
摩洛哥陣中係有唔少有質素嘅球員,當中艾爾比較欣賞踢緊巴黎聖日耳門嘅阿舒拉夫。AP


艾爾曾經講過,加拿大第一場對比利時真係打得唔錯,仍然有爭出線機會。嗰場比利時同樣打三中堅陣式,但維頓漢、艾達韋列特同丹當斯卡嘅組合,早段被對手不斷壓逼,好多時候都交唔到波,製造唔少險象。幸好有泰拔高圖爾斯屢次化險為夷,先可以僅勝加拿大。

比利時第一場踢得麻麻哋,除咗後防面對高壓逼搶踢得辛苦,中前場球員嘅表現亦比預期差,尤其係奇雲迪布尼,上半場有兩次「人多打人少」嘅情況下,都將個波分去唔係太合適嘅路線,似乎未在狀態。前鋒巴舒亞伊就一如預期咁令人失望,成場比賽只有射入嘅一球較好,其他時間近乎做咗「隱形戰機」。作為車迷嘅艾爾,都知呢位球員靠唔住,只係盧卡古繼續受傷,陣中又無其他中鋒,佢惟有頂住先。艾爾覺得比利時陣中有唔少年輕嘅球員可以出下場,特別留意今季轉投李斯特城嘅菲斯,佢嘅用波能力同傳波準繩度,相信會為比利時帶嚟唔少幫助。

北非球隊摩洛哥上場悶和克羅地亞,即使控球比率比較低,但八次埋門多過對手,證明球隊嘅反擊都有一定威脅,只係比握力比較一般。摩洛哥陣中係有唔少有質素嘅球員,當中艾爾比較欣賞踢緊巴黎聖日耳門嘅阿舒拉夫,佢喺右路嘅進攻角色非常重要。摩洛哥上場踢得唔錯,但要留意佢哋嘅正選同後備陣容實力有一定差距,如果半場仍然久攻不下,對住比利時便有一定危機。

今屆非洲球隊有個特性,就係上半場防守上幾有紀律,令唔少球隊幾難破到密集。以比利時上場嘅表現睇,今場對住摩洛哥未必可以咁快入到波,半場和有得諗。艾爾

立即下載 | 全新《星島頭條》APP : https://bit.ly/3yLrgYZ