世界盃2022|專欄:美國逼搶克荷蘭

更新時間:10:00 2022-12-03
發佈時間:10:00 2022-12-03

三十二場分組賽終於完晒,等艾爾好似《猜波台》某位忠實聽眾咁,用「數白欖」總結下先。

卡塔爾零分出局,係歷屆主辦國之辱。英格蘭首名出線,簡尼射門鞋去咗邊?阿根廷後來居上,翻版Sam哥心很傷。丹麥全隊狀態差,輸畀澳洲認真抵話。日本殺低兩強隊,德國出局咎由自取。比利時黃金末代,歐洲紅魔風光不再。巴西今屆重逼搶,缺少尼馬實力仍強。葡軍新星多的是,C朗都要行埋一邊?非洲球隊好出色,天時地利夠晒威力。殺入淘汰賽階段,美斯能否得償所願?留意《猜波台》直播,包你睇到笑呵呵,笑呵呵!

緊接住嚟十六強,下線形勢會比上線緊張。艾爾今屆比較鍾意的荷蘭就喺上線,今晚會同美國一決勝負。本來對「橙衫軍團」有啲期待,但頭三場賽事踢得一般。球隊只有加普比較搶鏡,迪比做咗「隱形戰機」,杜費斯喺邊路貢獻有限,而中場活力唔夠,全隊踢到老鼠拉龜。雲高爾要諗下辦法,點樣提高球隊攻力,如果未能夠盡快入波,今場對住美國,艾爾覺得會非常難踢。

美國再度晉身十六強,實際並非僥倖。美國打法以高位逼搶為主,再等機會打反擊。上場就係靠前線持續壓逼,令伊朗下半場踢得非常辛苦。事實上,祖殊沙根特、基斯甸普列錫、達斯等球員已經喺歐洲球會搵食,非常熟悉高位逼搶打法。球隊只需要改善前線把握力,並不斷向荷蘭中場施壓,相信可以為對手防線帶嚟麻煩。

艾爾覺得美國打法可以克制荷蘭,呢場推介讓球受讓「+0.5/+1」下盤,半場和亦諗得過。  - 艾爾

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ