世界盃2022|專家分析:摩洛哥幕後英雄

更新時間:10:29 2022-12-08
發佈時間:10:29 2022-12-08

西班牙再次喺互射十二碼階段落敗,連續兩屆世界盃十六強出局。先唔講連續三球十二碼射失嘅問題,球隊全場傳球次數達一千零五十次,最後一球都入唔到。前綫艾華路莫拉達、費倫托利斯毫無建樹,中場加維、柏迪喺進攻上幫唔到手。部分位置嘅能力不足,令呢種傳控足球瞬間變得「有姿勢,無實際」。即使炒咗安歷基,換入第二位教練,都係無補於事。

至於擊敗西班牙嘅摩洛哥,門將耶辛尼保奴連救兩球十二碼嘅神勇表現固然值得一讚,但艾爾更欣賞球隊嘅鐵血防守。小弟有拜讀加利李爾嘅文章,深知摩洛哥部分球員非常有個人特色,但睇完過去四場只失一球烏龍球,再睇埋上場後衞沙斯踢到有傷,仍繼續頂硬上嘅表現,足以證明後防球員嘅防守紀律同集中力非常強。

摩洛哥呢幾場比賽喺中路嘅防守非常嚴密,除咗兩個中堅之外,三人中場不時會落番禁區補位。面對呢種鐵桶式防守,克羅地亞、比利時同西班牙呢啲歐洲中上級別球隊都入唔到波,防守非常硬淨。呢支北非球隊喺反擊亦非常有威脅,上場對西班牙下半場連埋加時只係起腳三次,都有兩次中目標,唔係後備入替嘅華列查迪拉一次又一次錯失單刀機會,摩洛哥未必要踢到互射十二碼階段。

防守紀律強,反擊具侵略,球隊更不時以死球入波。老實講,摩洛哥球員唔係個個頂級超卓,可以喺咁短時間有咁大改變,盡力喺有限資源下踢出最大效益,領隊列格古有非常大嘅功勞。嚟緊面對葡萄牙,艾爾相信會係一場非常精采嘅攻防戰! —艾爾

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ