吳海昕（Sofiee）繼《教束》後，最近在ViuTV新劇《I SWIM》再做老師，演的「Miss翁」是中學男校班主任，還負責帶領學校泳隊四處出戰。對住一班仔仔，Sofiee劇內好惡好硬淨，但私底下男仔頭的她，跟小鮮肉玩到癲，32歲的她亦坦承受他們感染而回春。採訪：杜杜 攝影：沈健程 形象：PIPA Creative髮型：Zap Tang @toniandguyhk.official 化妝：Onki Lau 服裝：Valentino
為了管好一班男學生，「Miss翁」要好惡好強勢，不過私底下的Sofiee卻被一班男拍檔當作男人相處，仲搞到她一度被導演馮志強訓話，「佢哋做中學生，鏡頭前後都係打打鬧鬧，又拗手瓜，做好多小學雞嘅嘢，搞到我有時貪玩因子出咗嚟，導演成日叫我唔好玩得咁癲，因為我係老師，唔可以好似學生咁放縱自己，佢訓話完我就會收埋自己啲貪玩，roll完機先至同佢哋一齊癲囉！」
自認努力型演員
第一次跟接近全男班開工，Sofiee坦承拍過特別開心，過了一個開心暑假，「全部都係小鮮肉，自己都回春咗，我講緊個心境，見到佢哋為個劇付出咗好多，有個劇令到佢哋咁有動力花咗兩、三禮拜去學游水，我都有份學，講我係浸親，我真係本色演出，因為我唔識得游水，導演覺得太危險畀我學埋游水，上年個暑假大家一齊過咗三、四個月好開心，嗰種火真係好少見。」
這套青春偶像劇背後，探討努力與天賦的課題，而Sofiee自言本身沒太多才華，當演員絕對靠努力多於天份，「由細到大我模仿能力最強，甚至我大學時寫論文，我參考完人哋嘅論文變成自己嘅嘢，仲令到件事變得更加好，呢樣嘢係我嘅才華，我將呢個才華努力變成𠵱家嘅職業，但我係努力嘅演員，因為真係有太多天才級嘅演員，張曼玉呢啲行出嚟唔使講嘢，對眼就識講嘢，但係我嘅努力，可以令到好多人覺得我好有誠意，畀我嘅努力觸動到。」
星島新聞集團慶回歸25周年專題網站，請即瀏覽
立即下載 | 全新《星島頭條》APP https://bit.ly/3yLrgYZ
