恭喜發財！踏入新春佳節，蔡少芬（Ada）與陳法蓉（Monica）實行搞搞新意思，齊齊大煮兩度賀年菜：「萬事如意五福袋」、「招菜進寶黃金蝦」，跟大家拜年。兩位相識逾20載的好閨密，難得首次共同下廚，即「針鋒相對」笑料百出，當中Ada更大爆Monica大派「檸檬」拒絕跟她的細仔張樂兒上契。

現身煮場的Ada與Monica表現有板有眼，無論洗丶切、煎、炒皆無所不曉，絕對係「美貌與廚藝並重」。當中自誇「煮咩都OK」的Ada，透露閒時經常入廚，就連囡囡返學的飯盒、點心均由她一手準備，但自從細仔出世後，忙於照顧兒子，才疏於入廚；其後，Ada又向Monica「笠高帽」表示：「其實我哋兩個煮嘢都叻，叻喺唔同範疇，Monica蒸嘢好叻！」Monica聞言即沾沾自喜說：「係呀，曾經喺蔡瀾節目，煮過冬菇煀雞，蔡瀾試食後話係佢食過最好食嘅冬菇煀雞。」身旁Ada即神回：「係咪蔡瀾從來未食過咋！」此話一出即全場哄笑。