梅小青受訪電台節目《舊日的足跡》，入行40年退休在即，她坦言現時依然將精神放在熱播電視劇《法政先鋒IV》上，並感謝所有參演的演員，說：「當我邀請演員參演嘅時候，冇話佢哋知呢齣係我最後（監製）嘅一套劇集，但佢哋都撐我……首先多謝四哥（謝賢），我佢嘅小粉絲，當年去片場搵佢同芳芳姐（蕭芳芳）簽名，但我一直唔認識亦唔敢搵佢，今回我臨別秋波托好朋友開口邀請，佢好快就答應。誰知記者會第二日，四哥打電話畀我話唔做喇，怕辛苦……一下子我嚇傻咗！我好感激拉姑（狄波拉）在旁邊幫口『應承咗唔可以唔做㗎！』四哥先話『小青我玩吓你咋！』其實四哥演出非常認真，服裝全出私伙……我哋冇傾片酬，我畀一封利是佢作車馬費，佢初時都唔肯收，總之四哥時刻都散發出一股濃濃嘅星味啦！」

小青姐一直以來都小心選角，條件是要有演員道德，團隊合作亦要開心。問及今次是否錯選了黃心穎？小青姐直言不覺：「我喜歡心穎係由《宮心計》開始，佢好甜唔造作，嗲亦唔會過火，《法證IV》我早預佢一份，佢熟讀劇本，好快拿揑到我哋要啲乜。可惜發生咗呢個Case（安心事件），我好意外亦好心痛。」小青姐坦言心穎一定是錯，本來大有前途，現在受了很大的懲罰，並謂生命有take 2，這麼年輕應該再給她機會的。從手上三四個女演員中找來湯洛雯（靚湯）代替心穎的角色，原因小青姐覺得靚湯好甜、好有 heart：「我要佢減肥，但似乎唔太成功，於是我同自己講，我揀佢並非因為佢個樣同體重，係因為佢可以做到我劇中嘅角色。佢同心穎唔可以比較，各有各嘅好處，佢（靚湯）入組廿幾日就做到呢個成績，我非常滿意！」