由衛詩雅（Michelle）主演的愛情小品《熟女愛漫遊》將於4月2日上映，全片在日本東京取景，為了突顯由衛詩雅飾演的「陶莎莎」天真率直的性格，電影美指出身的導演蔡潔鈴和服裝組，特別為她度身訂造了超過30個造型，Michelle表示：「開拍之前試造型，導演話可能要試兩日，我心諗有咩可能要試咁耐？點知上到去以為自己去咗Boutique，因為佢哋差唔多準備咗成50套衫，而且好多都係走可愛路線，好Cute好少女又Colourful嘅服飾俾我，每試一套衫都覺得自己後生晒，變返22歲嘅年紀，其中有幾個造型我好鍾意，劇組拍完戲仲特登送俾我留念！」