資料圖片
近月疫情咁犀利，全世界經濟冧檔，本來絕大部分生意蒙難，蝕到喊阿媽。
不過，在蠱惑佬眼中，正是有危就有機。因為危難一到，人人恐慌。一恐慌，理性系統就會失靈，胡亂出招。此時，心水清的大鱷，唔郁手就「唔姓鱷」啦。
最普通招數，是趁你驚青出貨，踩多腳，然後部署私有化。因只有上市公司掌舵人，才百分百掌握自己公司有幾多寶藏、究竟值幾錢。總之等呀等，等到公司股價偏低時，即放壞消息，再推冧一點，然後反手搞私有化，食其大茶飯！
另一類，則是「製造假象」。這個，千禧年代時的科網股熱潮，乃最佳例子。當時個個股民似撞邪，凡見上市公司有「.com」的，就瞓身，懵到信「Burning Rate」（燒銀紙率）等於盈利大有前途！癲成咁，蠱惑大鱷唔趁機剝你光豬就奇矣。
好嘞，呢幾個月，新型肺炎席捲全球，人人恐慌，連見慣世面的大國領導人也全失方寸。此時，一眾蠱惑大鱷，當然空群而出掠水。由此，突然有多家公司包裝成「抗疫版塊」，大賣製造口罩、呼吸機、消毒液、防護衣、病毒基因研發、抗疫藥品製造……概念。以上公司，有的是扮晒正正當當「自願性公告」，有的則使橫手放消息。事前，當然配合實力龐大炒家集團，先由佢哋掃上，再引散戶跟風，聽見「抗疫概念」即仆入市。事實，呢班大鱷近期真係又得米。「橋唔怕舊，最緊要受」，虛晃一招，立即肥到着唔到襪。
監管當局又如何？且看會否道高一丈做下嘢嘞，最起碼搵幾家「照肺」，殺一儆百啦。
「抗疫概念公司」，其實，唉，睇真啲，所有計畫多數十畫，甚至百畫、千畫都未有一撇，純粹似娛樂圈宣傳技法——煲水！
小股民今次衰咗，就當交學費啦。（曾智華）
全文刊於《星島日報》「阿碌開咪」專欄
