吳家麗受訪何嘉麗主持的ViuTV《金像女情》，來到一間有數十年歷史的影樓，吳家麗望著懷舊的擺設，令她回想過去演過不同年代的女性。「我最鍾意係 30，40年代上海女性，好有韻味，曾經在內地拍戲時候有演員估我係上海人，話我眉梢眼角都似，其實我係好吃得苦嘅潮州妹！」
入行多年，吳家麗確實是不折不扣吃得苦的潮州妹，從訓練班畢業由閒角幾句對白做起，當時閒角是沒有資格會有天書（劇本），不過有一日她終於收到天書，記得當時喊了出來，不是因為太高興，是戲份重了、好大壓力！從電視轉到大銀幕，接拍了新藝城第一部電影《龍虎風雲》便備受注目。
「當年發仔 (周潤發) 都因為演呢部電影由票房毒藥變為票房天王！我雖然演唔正經嘅角色，但都係女主角。」這片令吳家麗成為電影圈新貴，她演小三角色更是深入民心；從電視轉往影圈發展，原來是前輩楚原為她打下強心針。
「當時與電視台滿約，我十五十六未有決定，但楚原叔就叫我唔好續約，出來拍電影啦！你係啱電影嘅！當年唔係太多女演員同我爭，張曼玉、鍾楚紅、張敏都係做女主角，有妖艷、風塵角色就搵我做，嗰時冇咩人演呢類角色，我冇對手、唔憂做！鄭裕玲係鄭九組、吳君如係吳九組，我都係吳九組！」她記得當年忙到沒時間睡，行路都會瞌得著，要不斷打自己塊面，更試過揸車返到屋企在停車場撞到石墩。