觀察近日政情，明顯北京為香港局勢非常着急，冇辦法唔全方位出招矣。效果如何？大家可走着瞧。「硬手」已處處見，「軟手」呢？當然要吹大BB召齊自己友集氣，搞番勁個勢先。

邊個擔旗？由「國家領導人」，兩位全國政協副主席兼前特首董建華及梁振英孭重飛，任總召集人啦。來來來，連埋譚耀宗、譚惠珠、葉劉淑儀、李慧琼及吳秋北，組織「香港再出發大聯盟」！陣容好勁㗎，共有過千社會各界人士願意成為共同發起人。

本來，今天是個氣勢磅日子，因可以集合千幾人一同誓師，真係「唔打得都嚇得」，可惜，「限聚令」仍在，呢個盛大場面，無法現場直播了，睇睇稍後有冇機會影番張大合照啦。

小弟素來立場，總之為香港好，不理政治立場及顏色，就應鼓勵，這正是一個多元化都會的特色，所以，「大聯盟」口號「拒絕被撕裂，選擇團結，推動香港再出發！」，好得很。

不過，宗旨講完，有乜具體計畫達致目標呢？似乎未有噃！其實如今要團結的，絕非「愛國愛黨愛港」一族，因建制支持者，早早在北京領導下「心連心」。故「大聯盟」的目標，應該是團結「未被團結」的香港人，尤其百萬計年輕人，最為重要。因為未來香港，絕不屬於已經平均六十多七十歲的「大聯盟」核心人物。正如毛主席名言：「世界，歸根究柢都係佢哋嘅！」十幾歲到幾十歲年輕人，將會負責下半個世紀香港發展的呀！

過渡後的特區政府，種種政策中，最最失敗為「青年政策」。歷任青年事務委員會主席，全部無法與年輕人Connect，點解？牛頭唔搭馬嘴也。

去到呢屆政府，更弊！由政務司司長張建宗，一位七十歲的長者掌舵。年輕人一見佢個名，已打呵欠，點溝通呢？而佢，又鬼知年輕人需要咩？

「再出發大聯盟」，唔該獻個可行計畫！（曾智華）

全文刊於《星島日報》「阿碌開咪」專欄