早前藝人鄭秀文拍片大談紫薯同紫心番薯原來係唔同，雖然佢都唔係好識分，但就提及紫薯比紫心番薯更低糖份及熱量，變相更有效減肥，而鄭秀文更推薦如果想減肥效果更顯着，可以把紫薯隔夜食產生「抗性澱粉」減低澱粉質吸收，咁究竟真唔真？不如聽吓家營營養中心營養師吳瀟娜（Lillian）點講！

點分紫薯同紫心番薯？

原來紫薯同紫心番薯係屬於唔同科類！紫薯屬於甘薯類，表皮和薯肉均為紫色，表面較平滑；而紫心番薯則屬於番薯類，表皮是啡色又或是紫色，亦都比紫薯粗糙，而薯肉的紫色就比紫薯更深！

食紫薯比紫心番薯更有效減肥？

營養師Lillian表示，雖然紫薯熱量確實比紫心番薯低，但實質上兩者熱量相差不是太大，而且紫薯和紫心番薯各自含有不同的營養素，例如紫薯的維他命A及花青素含量較高，有較好的抗氧化功效；而紫心番薯則鉀質較高可以去水腫，兩者皆屬高纖碳水化合物，所以建議減肥時應交替食用，同時吸收兩者的好處。

食隔夜紫薯產生「抗性澱粉」可減肥？

「抗性澱粉」的產生是由紫薯、白飯這類澱粉質食物經過一天冷藏後，由部分澱粉質轉化而成。它是一樣不被身體消化吸收的物質，同時有助增加飽足感，變相讓我們吸收少了澱粉質而減少熱量吸收。但一般建議以冷飯或不加熱形式進食，因若果再次加熱就會減少「抗性澱粉」含量。

不過Lillian都補充，其實當中產生的「抗性澱粉」含量不是太高，所以對減肥效用不是太有幫助，不能單靠「抗性澱粉」減肥。若果真的要減肥都是要配合一個整全營養均衡的減肥餐單才可以。