劉佩玥及鄭詩君（C君）昨晚出席購物直播活動宣傳新劇《降魔的2.0》，提到C君在劇中露肉打格仔，劉佩玥笑他露肉拉低收視，C君即抵死稱：「露完收視立即回升！小朋友好鐘意睇，陸永個女都對住我不斷笑，可能終於有個成年人被佢哋恥笑，如果劉佩玥唔着嘅話，相信大人細路都喜歡。」劉佩玥就大讚C君敬業樂業，拍攝時只有9度，又凍又大風，但C君只穿斗篷，停機大家立即幫他着衫遮住要害。