影帝古天樂（古仔）真係一個好老闆！在新冠肺炎疫情影響下，各行各業都出現裁員潮，不過，有份酒家的古仔為保員工飯碗，早前已揚言不炒人、不要求員工放冇薪假，又下令其影視公司旗下的製作公司、經理人公司等所有職員Work from home，以減低染病風險；而本月初，他更宣佈跟英皇電影合作於未來兩年製作及發行10部港產片，實行拯救香港電影業！呢位「良心老闆」不單止出錢解困，私下仲毫無架子、非常錫員工，事關他周不時都會同一班手足及新一代歌手、演員食飯，聯誼吓感情，好似昨晚就為今日（20日）34歲生日的凌文龍（小龍）慶生，飲到面都紅晒的壽星仔於社交網貼出大合照，並留言：「有這麼溺愛我的老闆、經理人們同我預祝生日，仲特登讓出温暖嘅屋企嚟搞一個我至愛嘅打邊爐小派對，夫復何～～～～求～～#天高娛樂」隨後再分享一張與古仔的合照，他笑謂：「唔好妒忌我，生日真係大晒 #高富帥老闆 #魅力鬼才經理人團 #索爆經理人妻團」認真晒命！（笑）