早前業餘中佬組合「雙龍出海Double Dragon」成員火火及KB，全靠港人幫助順利開《萬人幫拖演唱會》，過程拍成真人騷。為答謝各方支持，「雙龍出海」再次出動，望在疫情為大家帶來歡樂，拍攝全新真人騷《萬人幫拖搞邊科》，下周一起逢星期一至五晚在ViuTV播映。火火及KB在首集提及創作構思及理念，更嘗試入紙申請紅館開演唱會。二人又應粉絲要求搜羅口罩予有需要人士，火火誠意十足，先是落區買冷氣機隔塵網作口罩材料，再到布行學做布口罩，落手落腳穿針引線，更親身到鬧市派送口罩給清潔工人，火火指：「佢哋冇口罩都喺高危情況下為口奔馳，值得尊敬！」