最近天氣炎熱，不過不少市民一返到辦公室就覺得寒風凜凜。有網民在facebook專頁「奴工處」投訴，其同事長期將辦公室冷氣溫度調校到10度以下，甚至得5度，令網民吹到病。

網民指，同事「靜雞雞」將冷氣校凍，網民本身怕凍所以在座位擺放幾件厚外套，誰不知同事變本加厲，因為「唔知邊部冷氣係打邊部，佢直接將所有冷氣教到10度以下，真係好離譜，最誇張調校到得5度」。網民稱，由於好多同事反映太凍，提高氣溫至19度左右，該同事於是校回10度以下。

網民就抱怨，「咁怕熱好心就買個風扇喺位喇，因為喺Office長期吹住，最後我真係吹到病咗」。帖文一出就引起熱議，有網民留言稱，「有無覺得自己提早體驗停屍間嘅感覺」、「較到咁凍，係殯儀館返工呀？」。

也有人質疑「請問邊款冷氣做到5度」，於是有網民上載圖片，證明一些舊款冷氣系統可以低至5度，形容「公司間房係雪房咁，玻璃長期有水珠」。

另外有人身同感受，透露「我凍到不停病，但公司經理仲要我病假都要返去公司頂人食飯，最後公司個經理，用唔健康做理由，唔俾我過試用，我去平機會投訴被殘疾歧視，驚動董事局，個經理和有份簽我走的直屬上司，公司即時俾兩個月通知她們起身離職」。