早前有傳李佳芯（Ali）畀無綫「雪藏」，《BB來了》、《白色強人》等續集都冇份拍，隨住新劇《殺手》推出，係咪代表獲全面解凍？Ali就唔多願正面回應，只係避談回應：「唔答喇，我怕答完轉個頭返屋企又傳我被雪藏，咁就冇意思啦！做好本分啦！」李佳芯話，現時最期待劇集及散文集推出。

 

繼《白色強人》後，有一年冇劇作出街嘅Ali，昨晚急不及待在IG上載喺6月29日播出嘅新劇《殺手》宣傳片，片中傻更更「四眼妹」Ali師奶仔上身應徵做殺手助手，因為貪錢，一輪咀喺度講價講入職條件...唔怪得她留言：「來一個反差#殺手」粉絲即時讚好，紛紛留言：「呢個四眼妹......我鍾意」、「好可愛」、「你睇下佢做得幾搞笑幾自然，殺手一定好好睇！」、「又靚又好演技又搞笑，視后女神當之無愧，支持錢向茜！」

 

另外，又她貼出同中文科補習導師林溢欣（YY Lam）嘅合照，並寫道：「感恩遇上很好的出版社，認識一班很好的製作團隊。由零開始、從無到有，從未想像過的感受，期待！#commingsoon #ALife」原來YY Lam自資開出版社，今次跟李佳芯合作出書，散文集將會在暑期間推出，主要分享她由細到大嘅事情及感受，愛情方面都有提及部分經歷。唔少fans話好期待同必買，有問書名係咪應該係芯路歷程？又讚Ali總是默默地做要做的事，鼓勵她加油。