政府派錢，好多藝人都有申請。
家燕姐
「今日疫症又爆發，好驚呀！嗰一萬蚊用嚟買防疫用品，好似口罩、清潔消毒劑，希望疫情快啲走啦！先排我都捐咗啲口罩畀老人家，佢哋真係有需要。」
黃翠如
「因為我領養番嚟嘅狗仔小六隻腳有事，要長期打骨針，所以有咗呢筆錢，就會當係佢嘅保健基金！」
黎耀祥
「嗰一萬蚊當然要刺激消費使咗佢啦，《殺手》喺8月7號大結局，最好用嚟請《殺手》台前幕後食飯睇大結局，如果幾個同劇主要演員，好似陳豪咁，一齊攞埋嚿錢出嚟請食飯，仲可以食豪啲，呢個安排係咪好Perfect呢？」
森美
喺疫情期間曾經成為隔離家庭的森美原先話冇諗到一萬蚊點使，後來又改變主意：「先儲起二千蚊，再用二千蚊晚飯，二千蚊買書睇增進知識，用二千蚊買份禮物𠱁老婆開心，二千蚊買口罩同搓手液，當然仲要買定糧油，分分鐘又預備喺屋企被隔離，以備不時之需。」
陳展鵬
「應該會捐一部份，其他未決定，因為啲錢未到手，到咗再算！」
黃智賢
「買啲Coupon畀三個女游水啦！海灘又驚污糟，去啲有暖水游池嘅地方啦！又可以買盒靚靚嘅水彩畀我老婆啦！等佢開心啲去畫畫啦！𠵱家啲油彩好貴吓，政府幫補咗好多，多謝晒呀！」
江美儀
「會將部份捐出嚟，幫襯明哥買飯票幫助社會低下階層，因為幫到人就好啦。」
黃澤鋒
「阿囡聽日一歲生日，雖然我哋唔主張買禮物，但係生日蛋糕一定要有，所以有咗呢筆錢就會買靚啲嘅蛋糕，另外我自己會換過部新款手機，因為老婆嗰部真係影得阿囡好靚，我成日都輸畀佢㗎！」
李司棋
「我將一萬蚊捐咗畀一個朋友，佢先生生病，日日以淚洗面，冇辦法啦！其實幫咗人個心係舒服，係好開心嘅，助人為快樂之本嘛！」
