公共交通工具今日開始強制戴口罩，但未有規管的地方仍有人欠缺衛生意識。有街坊指土瓜灣街市一間凍肉鋪，有阿伯拉低口罩亂摸凍肉，而店員也不理會，有播毒之危。

有街坊在「土瓜灣之友」Facebook群組發文，指土瓜灣街市斜對面一間凍肉鋪，一個阿伯「唔戴口罩一邊咳」，更未有用凍肉夾，「一邊用手狂巢d凍肉」，店員竟也放任不理，提醒街坊們通知家人，自行「執生」。

網民都擔憂播毒，「OMG! 我有時會幫襯」、「而家日日咁多單，仲有啲咁污糟嘅人，真係離譜」，不過也有人認為不是店鋪的責任，「如果你開鋪請員工返嚟，你會唔會保證啲員工100%照你意思去做？」、「做得街市忙起嚟真係睇唔到咁多，我唔覺得員工睇到唔出聲囉」。

店主其後留言解釋，早兩日都有貼出通告要求客人帶口罩，亦有叫同事跟指示去做，但有時候繁忙時段人手有限，「剛亦問過同事了解，同事亦都話有要求佢戴番口罩，今次事件會再立即跟進，會再三提醒員工留意同類情況，抱歉」。