公共交通工具上不可飲食，政府更宣布必須要戴口罩，不過仍然時不時有人違規，近日有網民搭巴士時就驚見一名男子拉低口罩大歎啤酒，怒斥播毒。

網民在「屯門公路塞車關注組」Facebook群組發帖，指早上9點搭巴士時，一名男子拉低口罩飲啤酒，更一邊玩電話，似乎非常享受，「係全程出到上環都無拉返高，慢慢邊玩電話邊歎佢罐啤酒」。

不少網民都批評男子播毒，「拉得俾告票」、「影相俾司機睇」，但亦有人認為類似事件已經太多，事主應該上前制止而非網路公審，「做咩唔直接剷佢呢，又或者同車長講」、「呢啲情況你要出聲唔好dry影相先得㗎，唔出聲佢下次就繼續係咁」。