九巴的社交專頁不時惡搞社會時事，專頁今日上載一張「醜樣的定義」插畫，畫中正是早前在車上拒戴好口罩大鬧的男女乘客。

稱吉祥物「九巴仔」自問同「醜樣」兩個字絕緣，但早前有一位乘客對車長講：「你可唔可以唔好咁醜樣呀！？」，「九巴仔」形容嚇咗一跳，「呢位乘客簡直顛覆咗九巴仔對文字嘅認識，重新將醜樣定義啊！」。

九巴於是詼諧地反擊，「可能人人審美觀唔同啦！九巴仔就覺得遵守九巴規則嘅，都係人美心善嘅好乘客，而唔守規矩、上到車亂咁嚟、個口罩戴啲唔戴啲、唔根據車長指示嘅乘客就…咳咳咳，不予置評喇！」

九巴更在帖文用上主題標籤，「#醜樣的定義 #巴士新鮮事 #香港最好的風景是乘客 #別破壞這風景 #戴好口罩」

不少網民讚好九巴「抽水」高明，「九巴抽得靚呀」、「笑到肚痛」、「平時唔多覺九巴仔咁幽默嘅」

事緣本月4日，一對情侶乘搭昂坪前往東涌的巴士期間，因無戴好口罩被車長勸喻，情侶惡人先告狀反鬧車長多事，司機指戴好口罩是公司規矩，女子發難：「你尊重下你自己個腦先啦！你知唔知你自己講緊啲咩嘢呀？你著好件衫好冇呀？你可唔可以唔好咁醜樣呀？可唔可以唔好出街呀！」，女方又聲稱「個口罩太大呀，關我咩事呀！遲啲係咪要整容去戴口罩呀我？」，男方突然舉起中指做出不文手勢，最終乘客無奈報警。警方經調查後，本月5日以涉嫌誤導警務人員及違反「口罩令」將兩人拘捕。