疫情反覆，多個行業飽受衝擊，政府一度話取消年宵花市，無幾耐又復辦，但規模大縮，搞到一班花農無所適從，大批年花唔知點去貨。大棧老闆Sam哥同「蘭花大王」楊小龍相識廿載，Sam哥聽到年宵市場嘅消息後，二話不說，引入蘭花於大棧全線分店售賣，楊小龍大讚佢好心，好感謝佢幫手。

Sam哥指，「本地種植嘅『千葉園』優質蘭花，絕對能滿足有要求嘅大棧顧客。」佢話，要種出好蘭花，必須置於空氣流通嘅地方，而千葉園蘭花由種子開始，就喺本地溫室培植，除花期特長，達兩、三個月外，擺放得好，所有花蕊都會盛開。

Sam哥以花寄意，「蘭花生命力好強，乾旱缺水的逆境中，仍然可以開得好燦爛，就好像我哋面對生意差嘅時刻，仍然掙扎求存，把握任何機會，自助又助人，更要做得漂亮出色！」

楊小龍話Sam哥以往年年向佢買蘭花放喺公司，當Sam哥知道年宵市場嘅事，就問佢有乜可以幫手，佢回應話︰「幫手攞啲去賣啦！」Sam哥靈機一觸，話有得諗，付諸行動，即時入貨，變成大棧全線分店都有靚蘭花賣嘞。