港交所前任行政總裁李小加去年底正式退任，未來會下海從商，還是會轉跑道從政，城中好多人都關心。不過，佢未來搞乜都好，總之就有充足彈藥。據港交所業績披露，原來佢在最後一個年度收咗成一點二億酬金，比對上年度的五千一百萬勁升一倍有多。

李小加人工勁升，最主要來自表現花紅，細看港交所業績，李小加上年酬金包括薪金九百三十一萬，最突出係份表現花紅，足足有成八千零七十萬。港股去年在疫情下表現甚佳，有大量中概股回歸，加上北水源源而來，交投勁升。據城中金融界中人講，滬深港通能夠開通，李小加真係出咗好大力，令港股不但交投及新股上市數量都表現強勁，咁李小加收億零人工，又唔係好過分喎！

至於港交所主席查史美倫，去年人工都有增加，由四百六十多萬加至四百九十多萬。